Kico ta abuso di mucha?

Abuso di mucha ta incera cualkier tipo di maltrato emocional, sexual y fisico of negligencia cu ta wordo causa door di un adulto cu tin e responsabilidad pa e cuido y desaroyo di un menor di edad. Un mucha entre 0 pa 18 aña ta wordo considera como un menor di edad.

Nos ta papia di abuso di mucha ora ta referi na cualkier tipo di accion of falta di tuma accion di un adulto, cu ta resulta den consecuencianan grave pa cu e desaroyo di e menor. E adulto por ta un mayor, un miembro di famia, un cuidado di e mucha y tambe otro adultonan responsabel por ehempel: coachnan di sport, docentenan etc. 

Abuso fisico, abuso emocional, abuso sexual, negligencia y violencia domestico tur ta formanan di abuso di mucha.

Ora un persona ta dal of haci daño fisico intencional na un mucha, esaki ta wordo considera como abuso fisico. Ora un persona ta keda sin duna un mucha locual ta su necesidad basico di bida manera: cuminda, un dak pa e biba, scol, structura den su desaroyo, educacion of recreacion tambe ta un forma di abuso di mucha.

Actonan di abuso fisico di mucha:

  • Bati un mucha
  • Kima un mucha, cu awa cayente, sigaria etc.
  • Sofoca of choca un mucha
  • Sacudi, tira, dal of morde na su curpa
  • Hoga of wanta bou di awa
  • Duna un mucha veneno cu ta afecta su salud
  • Kishiki den forma extremo y sin su permiso
  • Kinipi, pas’e un wanta of lag’e cay pa malo
  • Tur otro forma cu ta haci daño na su curpa

Retene un mucha di por drumi bon, come bon of haya su medicamento tambe ta conta como abuso di mucha

Con pa señala abuso fisico di mucha?

Ora un mucha ta wordo abusa fisicamente por reconoce esaki na cierto señalnan. E señalnan por ta varios y ta diferencia pa cada mucha y su situacion specifico. E ta importante pa semper tene cuenta cu tin e posibilidad cu e señalnan aki no semper ta duna indicacion cu tin abuso fisico di mucha andando y cu esakinan por a wordo causa door di otro motibonan. Pa es motibo semper mester keda alerto y no keda keto pa busca ayudo of conseho di nos profesionalnan. Paso cu e accion corecto bo por salba un bida.

Señalnan di abuso fisico:

  • E mucha ta expresa y ta papia cu un adulto ta abusa di dje
  • Pleki blau na wowo, cara of curpa cu no tin splicacion aceptabel
  • Weso di curpa kibra, marcanan di djiente (mordi) of kemadura riba curpa
  • Cambio diripiente den comportacion di un mucha
  • Comportacion hopi bruto, agresivo of hopi negativo
  • Comportacion demasiado keto y tin hopi dificultad pa cera amistad
  • E mucha ta protesta, yora y sclama ora cu e mester bay cierto luga por ehempel: su cas, scol, creche, of na un otro luga of cas cu e abuso ta tuma luga 
  • E mucha ta mustra di tin hopi miedo pa un persona specifico 
  • E mucha ta hopi alerto y ta ansha mescos cu algo malo ta bay pasa cu ne
  • E mucha ta reacciona cu miedo ora bo mishi cu ne
  • E mucha ta bisti paña inadecua pa tapa e marcanan ariba su curpa por ehempel; manga largo, carson largo ora ta haci calor
  • E mucha ta mustra mal cuida y ta semper cansa
  • E Mucha ta keda te lat ariba caya y ta parce bandona
  • E Famia ta hopi isola y no ta permiti e muchanan pa tin contactonan cu otronan

Ora bo ta sospecha di abuso fisico di un menor tuma contacto dibiaha cu Bureau Sostenemi na 588-1010 pa conseho of ayudo. Den caso di emergencia yama Polis 100. Actua mesora, no keda keto!

Abuso emocional por causa un impacto profundo ariba un mucha y su efectonan ta pa bida largo. Abuso emocional ta ora un adulto den cuido di e mucha ta keda sin duna e mucha cariño, amor, calor of atencion cu e tin mester pa su desaroyo social-emocional. 

Abuso emocional tambe ta incera abuso verbal, caminda e mucha ta wordo grita, humilia y insulta constantemente. Abuso emocional por laga un mucha sinti cu e no tin balor y cu niun hende no ta stim’e y e impacto negativo aki tin su efecto riba e bida completo di un mucha. 

Actonan di abuso emocional di mucha: 

  • No ta permiti un mucha expresa su punto di bista of opinion 
  • Ridiculisa un mucha pa locual cu e ta bisa
  • Pone un mucha keda keto of ta pon’e cera su boca constantemente
  • Grita y ta menasa un mucha constatemente
  • Cherche di un mucha pa su manera di ta 
  • Duna un mucha e “silent treatment” como castigo, esaki ta nifica cu no ta papia cu e mucha pa un periode como un forma di castigo 
  • Ta limita contacto fisico cu un mucha, no ta dun’e brasa of calor
  • Ta yama un mucha nomber y ta bis’e cu e “no ta sirbi” of cu e “ta un eror”
  • No ta permiti pa un mucha tin contacto cu su amigonan
  • Ta trata un mucha malo dilanti otro hende por ehempel: dal’e, pas’e un wanta of grit’e
  • Ta “bully” un mucha, ta conta tambe pa “online bullying”

Tur e formanan aki di maltrato tin un cierto nivel di abuso emocional den dje y esaki por causa un mucha hopi daño emocional y ta afecta su persona den futuro como adulto. 

Con pa señala abuso emocional di mucha?

Ora un mucha ta wordo abusa emocionalmente por reconoce esaki na cierto señalnan. E señalnan por ta varios y ta diferencia pa cada mucha y su situacion specifico. E ta importante pa semper tene cuenta cu tin e posibilidad cu e señalnan aki no semper ta duna indicacion cu tin abuso emocional di mucha andando y cu esakinan por a wordo causa door di otro motibonan. Pa es motibo semper mester keda alerto y no keda keto pa busca ayudo of conseho di nos profesionalnan. Paso cu e accion corecto bo por salba un bida.

Señalnan di abuso emocional:

  • E mucha ta mustra cu e tin hopi miedo y ansiedad 
  • E tin un comportacion hopi bruto, agresivo of hopi negativo
  • Su comportacion ta demasiado keto y tin hopi dificultad pa cera amistad
  • E mucha no ta demostra amor of cariño na su mayornan of un adulto specifico
  • E mucha ta mustra comportacion cu ta inapropia por ehempel: chupa dede na edad grandi 

Ora bo ta sospecha abuso emocional di un menor tuma contacto dibiaha cu Bureau Sostenemi na 588-1010 pa conseho of ayudo. Actua mesora, no keda keto!

Si bo ta sinti como mayor of cuidado di mucha cu bo mester di guia y sosten pa cu cuido y lantamento di mucha por tuma contacto cu Tienda di Educacion na 161.

Si bo ta un mucha of un hoben cu tin mester di guia of conseho tuma contaco cu Telefon pa Hubentud na 131

Abuso sexual ta wordo defini ora cu un menor di edad ta wordo forsa of invita pa participa den actonan sexual cu un persona. Tin hopi forma cu abuso sexual por tuma luga por ehempel;

  • Ora un mucha ta wordo forsa of invita pa participa den actonan cu ta pone e otro persona exita sexualmente, ta abuso sexual
  • Ora un un persona ta falta respet pa un mucha su curpa y ta mishi cu su partinan priva (vagina, penis of anus), ta abuso sexual
  • Ora ta duna e mucha carisia cu e no ta desea of ta inapropia, ta abuso sexual
  • Ora ta expone e mucha su curpa na un manera inmoral of pornografico, ta abuso sexual

E adulto cu ta comete un acto di abuso sexual contra un menor por ta un hende homber of un hende muhe. Pero den cierto casonan di abuso sexual ta un otro menor di edad, por ehempel un hoben den su pubertad, por ta e abusado. 

Actonan di abuso sexual di mucha:

  • Acto sexual cu penetracion, manera “rape” of sexo oral
  • Acto sexual sin penetracion manera mishimento cu paña bisti na parti priva, fregamento, sunchimento of masturbacion. 
  • Laga un mucha wak otro persona participa den actonan sexual, manera pornografia of den persona.
  • Laga un mucha hunga of uza obhetonan di placer sexual
  • Conta chiste di “dobel-sinti” of di “mal ehempel” na un mucha
  • Forsa of invita un mucha pa kita su paña pa placer sexual 
  • Mustra bo parti priva na un mucha “flashing”
  • Encurasha un mucha pa actua den un forma sexualmente inapropia 
  • Prepara un mucha pa abuso of actividad sexual ora e bira mas grandi “grooming”

Tur e actonan aki ta wordo considera como abuso sexual. Abuso sexual ta castigabel pa Ley y ta bay contra e derechonan internacional di mucha.

Con pa señala abuso sexual di mucha?

Ora un mucha ta wordo abusa sexualmente por reconoce esaki na cierto señalnan. E señalnan por ta varios y ta diferencia pa cada mucha y su situacion specifico. E ta importante pa semper tene cuenta cu tin e posibilidad cu e señalnan aki no semper ta duna indicacion cu tin abuso sexual di mucha andando y cu esakinan por a wordo causa door di otro motibonan. Pa es motibo semper mester keda alerto y no keda keto pa busca ayudo of conseho di nos profesionalnan. Paso cu e accion corecto bo por salba un bida.

Señalnan di abuso sexual:

  • E mucha ta papia y ta expresa di wordo abusa sexualmente 
  • E mucha ta demostra un concemento sexual of comportacion sexual cu no ta cuadra cu su edad ni ta normal pa su edad
  • E mucha ta desasocia su mes for di su famia y amigonan
  • E mucha ta huy for di cas
  • E mucha ta comporta straño of “shy” cu un persona specifico
  • E mucha ta haya mal soño “nachtmerrie” frecuentemente
  • E mucha ta cuminsa pishi su cama, algo cu prome e no tabata haci 
  • E mucha tin cambio drastico den su apetitit y su “mood” 
  • E mucha ta sali na estado of e ta haya un malesa cu ta wordo transmiti sexualmente (STD), prome cu e tin 14 aña 
  • E mucha ta demostra señalnan fisico caminda e no por cana of sinta bon 
  • E mucha ta haya rash rond di su boca 
  • E mucha ta grawata hopi na su parti priva (vagina, penis of anus)

Hopi caso di abuso sexual di un menor ta envolvi un persona cu e mucha conoce. Den mayoria caso di abuso sexual e mucha ta wordo forsa pa tene e relacion como un secreto. Un mucha cu ta wordo abusa sexualmente por hasta wordo menasa cu algo grave pe of un persona cu e ta stima, si e bay bisa algo of conta un persona. 

Den hopi caso di abuso sexual, ta trata di un adulto cu tambe a wordo abusa sexualmente como mucha. Pesey e ta importante pa kibra e ciclo-vicioso di abuso, pa preveni cu e “cultura di abuso” aki ta pasa pa e siguiente generacion. 

Ora bo ta sospecha abuso sexual di un menor tuma contacto dibiaha cu Bureau Sostenemi na 588-1010 pa conseho of ayudo.

Negligencia di mucha ta wordo defini ora e mayornan of e cuidado di mucha continuamente ta faya pa provee e necesidadnan basico fisicamente y psicologicamente cu un mucha tin mester cu ta resulta den un descapacidad di e mucha su salud y desaroyo. E efectonan di negligencia di mucha ta pa bida largo y por causa sentimentonan di soledad, isolacion y un autoestima hopi abou. 

Kico ta negligencia di mucha?

  • Ora cu no ta duna un mucha cuminda, paña of cuido di salud cu e tin mester 
  • Ora ta cera un mucha den un camber of un “closet” cu e no por sali 
  • Ora cu no ta duna un mucha e proteccion di un cas, ta bandona un mucha of ta saca un mucha for di cas 
  • Ora ta expone un mucha den un situacion peligroso caminda e por experiencia daño emocional of fisico 
  • Ora ta laga un mucha pa un periodo hopi largo su so na cas of un luga desconoci

Ora un adulto ta neglisha of no ta atende cu e necesidadnan emocional of fisico di un mucha, ta papia di negligencia di mucha, cu ta un forma di abuso di mucha. 

Con pa señala negligencia di mucha?

Si un mayor of cuidado di mucha ta comete actonan di negligencia di mucha, por reconoce esaki di e siguiente señalnan:

  • E mucha tin necesidad di cuido medico of dental cu no ta wordo atendi
  • E mucha ta cana rond cu paña sushi, cabey sin laba of ta cana rond sin baña 
  • E mucha ta haci uzo di alcohol of droga 
  • E mucha no tin placa of cuminda den momentonan cu no ta usual por ehempel: placa pa bus of pa come na scol
  • E mucha ta bisti e mesun pañanan tur ora y semper ta bisti inapropia tur caminda 
  • E mucha ta falta su scol frecuentemente 
  • E mucha tin mester di un “bril” pero nunca e tin esaki 
  • E mucha ta bisa of ta expresa cu e ta su so na cas y cu no tin niun hende pa wak pe na cas 

E señalnan aki hopi biaha ta acumula durante un periodo prome cu constata cu tin un caso di negligencia ta tumando luga. Pa es motibo semper mester keda alerto como adulto y no keda keto pa busca ayudo of conseho di nos profesionalnan. Paso cu e accion corecto bo por salba un bida.

Hopi biaha ora un mucha ta pasa den duro, ta nifica cu e famia tambe ta pasando den duro. Mayornan cu ta neglisha nan yiunan por ehempel, no tin interes den e desaroyo y bienestar general di nan yiu. No obstante, nos no por ignora e echo cu den hopi di e casonan aki ta trata di mayornan cu tambe mester di ayudo por ehempel cu:

  • Problema cu salud mental
  • Adiccion di alcohol of droga
  • Stress of depresion
  • Falta di apoyo di famia 
  • Nan no sa otro manera pa cuida nan yiu, y mester di e guia 

E ta tuma un comunidad pa lanta un mucha, pesey Comision Vision Pedagogico ta brinda e guia, sosten y educacion na mayornan y cuidadonan di mucha pa asina asisti den un forma preventivo den e lantamento di mucha y pa asina preveni tambe abuso di mucha. 

Si bo ta sospecha negligencia di menor ta tuma contacto mesora cu Bureau Sostenemi na 588-1010 pa conseho of ayudo.

Pa ayudo of conseho tocante salud mental di mucha tuma contaco cu Respaldo na 281-5000. Pa asistencia na cas tocante problema cu salud mental of problema cu adiccion yama Fact-Team na 585-6990.

Violencia domestico ta ora cu den un famia tin conflicto entre pareha. Violencia domestico ta e comportacion abusivo y violento den un relacion cu ta wordo causa door di un pareha pa haya of mantene control y poder riba e otro pareha. Violencia domestico por ta abuso verbal, fisico, sexual of psicologicamente y por pasa entre pareha heterosexual y tambe homosexual. 

Un mayor of un cuidado di mucha cu ta den un relacion abusivo por pensa cu e violencia no ta afecta e muchanan den famia. Pero echo ta cu hasta si e muchanan no ta wak e actonan di violencia aki, nan ta wordo afecta pa e conflicto den famia. Un mucha por desaroya problemanan serio emocional y di conducta. Lamentablemente, e problemanan aki hopi biaha no ta wordo reconoci pa nan mayor of cuidadonan y esaki ta resulta cu e mucha no ta haya e ayudo psicologico cu e tin mester. 

Ora ta trata di violencia domestico entre pareha, hopi biaha ta trata tambe di abuso di mucha. E mucha por wordo haci daño accidentalmente pero tambe intencionalmente. Pesey ora ta trata di caso di violencia domestico semper mester pensa ariba e bienestar y e siguridad di e muchanan den e cas. 

Con pa señala violencia domestico?

Pa bo por yuda un mucha cu ta biba den un cas cu conflicto ta importante pa reconoce cierto señalnan. E señalnan aki por ta varios y ta diferencia pa cada mucha su situacion specifico. E ta importante pa semper tene cuenta cu tin e posibilidad cu e señalnan aki no semper ta duna indicacion cu tin violencia domestico andando y cu esakinan por a wordo causa door di otro motibonan. Pa es motibo semper mester keda alerto y no keda keto pa busca ayudo of conseho di nos profesionalnan. Paso cu e accion corecto bo por salba un bida.

Señalnan di violencia domestico den muchanan chikito:

  • E mucha tin hopi ansiedad of un aumento di miedo 
  • E mucha ta desaroya depresion
  • E mucha ta perde interes den scol, amigonan of cosnan cu e ta gusta haci 
  • E mucha tin problema cu drumi, ta haya mal soño of ta pishi cama frecuente 
  • E mucha ta agresivo 
  • E mucha tin hopi rabia den su curpa 
  • E mucha ta pasa hopi mas tempo su so 
  • E mucha ta bringa na cas of na scol 
  • E mucha ta “bully” otro mucha of ta bira victima di “bullying” 
  • E mucha su apetit ta cambia completo 

Señalnan di violencia domestico den hobennan:

  • Ta cuminsa uza droga of alcohol 
  • Ta falta hopi scol of ta “spijbel” 
  • Ta cambia di grupo di amigo, cu mal influencia
  • Ta desaroya un akititud rebelde y ofensivo 
  • Ta cay atras den lesnan na scol y su puntonan ta baha 
  • Ta retene su mes socialmente di su amigonan 
  • Ta desaroya depresion of tin hopi ansiedad
  • Ta perde interes den scol, amigonan of cosnan cu e ta gusta haci 

Violencia domestico por sosode cu cualkier persona y hopi biaha e berguensa personal of pa famia ta stroba un persona pa busca ayudo. Pero nos mester corda cu si un conflicto entre pareha desaroya den violencia domestico, esaki ta bay keda sosode y si no busca e ayudo necesario e no ta bay stop. 

Si bo ta un victima of conoce un persona cu ta pasando den violencia domestico y mester di ayudo por fabor tuma contacto cu Fundacion Hende Muhe den Dificultad na 567-1670

Si bo ta sospecha di abuso di mucha tuma contacto mesora cu Bureau Sostenemi na 588-1010 pa conseho of ayudo.

Si bo ta den un situacion di emergencia y bo ta sinti cu bo bida di bo yiunan ta na peliger yama Polis na 100. Actua mesora, no keda keto!

Un di e miho forma pa prepara bo yuinan contra e peligernan di abuso di mucha ta door di papia cu nan y conscientisanan pa nan reconoce cierto señalnan cu por preveni maltrato of abuso den futuro. 

Algun tips:

  • Papia cu bo yiunan tocante comportacionnan apropia y inapropa 
  • Papia cu bo yiunan pa reconoce situacionnan sigur y insigur 
  • Siñanan kico pa haci ora un persona actua inapropia cu nan y con pa busca ayudo 
  • Mantene un comunicacion habri cu bo yiunan, pa asina abo como adulto por identifica cosnan cu ta fuera di normal den nan comportacion 
  • Percura pa bo hogar ta un luga sigur pa bo yiunan 
  • Preveni di laga bo yiunan nan so of cu un persona cu bo no conoce bon 
  • Semper ta na altura como mayor unda bo yiunan ta ora nan bay sali 
  • Siñanan kico ta sexualidad na un forma cu ta apropia pa su edad, esaki ta cuminsa di edad chikito cu e conocemento cu un mucha ta diferente cu un adulto. 
  • Custuma di yama e parti priva di un mucha na su nomber y no dun’e un nomber manera “koekie” 
  • Educa bo yiunan cu ningun hende mag di mishi cu nan partinan priva sin nan permiso, esaki ta conta pa abo tambe como mayor. 

Locual cu tambe ta yuda ta pa abo como e adulto responsabel pa un mucha desaroya un bon relacion cu e personanan den e bida di e mucha por ehempel; su docentenan, su “baby-sitter”, e mayornan di su amigonan, su coach di sport entre otro. 

Tur esaki por yuda detecta y hasta preveni posibel abuso di mucha. E ta yuda tambe na desaroya un “netwerk” fuerte den e bida di un mucha cu ta importante pa e sosten y vigilancia den cualkier situacion delicado. 

Como mayor, educador of cuidado di mucha bo por busca informacion, ayudo y guia tocante educacion sexual cerca Tienda di Educacion por yama na 161 of cerca Fundacion Pa Nos Muchanan por yama na 588-0856  of 583-4247.

Pa ayudo y conseho den educacion contra abuso di mucha por tuma contacto cu Fundacion RespetaMI na 582-4433.

“E bienestar y siguridad di nos muchanan ta e responsabilidad di nos tur” – Sociaal Crisis Plan