Categories
Public Relations

Depresion y con pa reconoce

Kico ta depresion y con pa reconoce esaki?

Depresion ta un enfermedad mental cu ta bay hopi mas leu cu nos sentimentonan. Por ehempel, ora di ta sinti sin animo y ora bo ta sinti tristesa. E sentimentonan aki, sin animo y tristo, ta algo cu ta wordo splica como sentimentonan pasahero. Esaki ta nifica cu e sentimentonan por dura un paar di dia solamente caminda ta papia di sintomanan leve.

Ora ta papia di depresion ta ora cu e sintomanan aki ta existi pa un tempo mas largo di por lo menos 2 siman sigui y caminda e kehonan ta mas grave cu ora bo ta sinti un tristesa pasahero pues cu ta dura un paar di dia solamente.

E sintomanan di depresion por ta;

  • Bo tin falta di apetit y bo no tin smaak di come;
  • Dificultad pa drumi caminda bo no por pega soño of ta drumi interumpi y ta lanta mucho tempran;
  • Bo ta drumi hopi mas cu normal;
  • Bo ta perde placer den tur cos;
  • Bo por tin pensamento ariba morto of pa haci un acto di morto;

Pero depresion ta existi den diferente grado. Ora cu un persona haya e diagnostico cu e ta depresivo, ta haci e anotacion tambe di e gravedad di su sintomanan sea nan ta; leve, modera of grave, di cual e lo sigui haya e ayudo cu e tin mester.

Den e temporada di crisis aki nos t’ey pa yuda esnan cu tin’e duro y cu ta sinti cu nan ta of ta bay cay den depresion. Den un forma anonimo y GRATIS por tuma contacto cu nos na 2810909 pa combersa un poco di bo situacion y e salud mental. Nos tey tur dia di 2pm te cu 8pm. 

Categories
Public Relations

Efecto di stress riba bo salud mental

Kico por ta e efecto di stress riba bo salud mental?

E temporada di crisis relaciona cu Covid-19 por duna hende stress. E stress aki por crea un efecto negativo riba e salud mental, caminda un persona cu hopi stress por desaroya un depresion. 

E peliger por ta mas grandi pa un persona cu den pasado a yega di experiencia un depresion. Den e temporada dificil aki, tin un chens mas grandi cu e persona aki por haya un recaida y por cay atrobe den un depresion. 

Depresion ta un enfermedad mental cu ta bay hopi mas leu cu e sentimentonan. Por ehempel ora di ta sinti sin animo y ora bo ta sinti tristesa. E sentimentonan aki, sin animo y tristo, ta algo cu ta wordo splica como sentimentonan pasahero. Esaki ta nifica cu e sentimentonan por dura un paar di dia solamente caminda ta papia di sintomanan leve. Un ehempel ta cu ora cu bo ta sinti bo sin animo of tristo pa tempo corto, semper tin cos cu por haci bo contento y por saca bo for di e estado tristo aki. No obstante tin hende cu ta experiencia e sentimentonan aki di un forma mas profundo, pa un periodo hopi mas largo y esaki por significa cu ta trata di un estado di depresion. 

Si bo ta un of conoce un persona cu ta sinti su mes sin animo of tristo den e temporada aki di crisis, corda cu e ta importante pa expresa esaki cu un profesional. Den un forma anonimo y GRATIS por tuma contacto cu nos na 2810909 pa combersa un poco di locual cu ta pone bo sinti bo sin animo y tristo. Nos tey tur dia di dialuna pa diadomingo, di 2pm te cu 10pm na 2810909.

Categories
Public Relations

Con pa maneha bo stress

Con pa maneha stress y ansiedad?

Ora cu bo tin stress y ansiedad e ta importante pa sa con por maneha e sintimentonan aki. Nos ta comparti algun tecnica con pa haci esaki.

Box Breathing – ehercicio di hala rosea:

Stap 1. Hala rosea aden pa un conteo di 4 seconde door bo nanishi;
Stap 2. Wanta e rosea aden pa un conteo di 4 seconde;
Stap 3. Saca e rosea afo door di boca pa un conteo di 4 seconde;
Stap 4. Warda 4 seconde atrobe y despues ripiti e ehercicio completo.

Por haci e ehercisio aki pa 5 – 10 minuut y e ta regula bo rosea y bo curason y ta laga bo sinti mas calmo.

Grounding technique: 5 diferente ehercicionan pa concentra.

  1. Busca 5 cos cu bo por observa y wak: purba di enfoca riba patronchi y detayenan cu bo por mira.
  2. Concentra ariba 4 obheto cu bo por mishi y sinti na bo curpa: por ehempel bo panja na bo curpa, e stoel cu bo ta sinta riba dj’e, e solo cu ta riba cay riba bo cuero, bo por hasta coy un obheto y wak con esaki ta sinti den bo man y concentra ariba esaki y e sintimento.
  3. Kico ta 3 zonido cu bo por scucha: pone atencion na zonidonan cu kisas bo mente ta purba di ignora normalmente por ehempel e zondio di un oloshi cu ta tik, e trafico pafo di bo cas, e biento cu ta supla.
  4. Busca 2 obheto cu bo por hole: purba di nota holornan den e aire rond di bo y concentra ariba esakinan.
  5. Un cos cu bo por smaak: Cana cu bals, mangel, menta of un snack chikito cu bo por uza pa e stap aki y concentra riba e sabornan.

Esakinan ta cinco diferente ehercicio cu bo por haci pa asina bo por calma bo mes ora cu e ansiedad y e stress ta cuminda acumula.

Si bo persona ta sinti ainda hopi stress y ansiedad e ta importante tambe pa expresa esaki. Den un forma anonimo y GRATIS por tuma contacto cu nos na 2810909 pa combersa un poco di locual cu ta duna bo e stress y e ansha. Nos tey tur dia di 2pm te cu 8pm. Nos tey pa bo!

Categories
Public Relations

Con stress y ansiedad por afecta nos?

Stress y ansiedad kico e ta y con e por afecta abo?

Stress ta un reaccion fisiologico normal na un situacion abnormal. Di e forma aki e ta un parti normal di nos bida. E ta permiti nos curpa adapta na e multitud di eventonan positivo y negativo cu nos ta experiencia manera nacemento di un yiu, casamento, perdida di trabou, perdida di un familiar y awo e crisis aki relaciona cu Covid-19. 

Stress ta bay y bin di su mes, dependiendo di e factornan cu ta envolvi. Contrario na miedo, cual ta un reaccion na un menasa specifico y defini, ansiedad ta un reaccion na un menaza no specifico y desconoci. Ansiedad ta manifesta na momento cu un evento peligroso of desafortuna por tuma lugar y nos ta pensa cu esaki muy probablemente lo bay pasa. Cada persona ta experiencia ansiedad na su mesun grado y intensidad. Con e evento anticipatorio ta wordo percibi lo influencia con hopi ansiedad lo wordo experiencia door di e persona. Den e momentonan aki di crisis e situacion relaciona cu Coivd-19 ta creando hopi stress y ansiedad den nos comunidad, no obstante nos tey pa yuda bo reconoce y manehe.

Con pa reconoce ansiedad? 

Sintomanan fisico di ansiedad ta encera un curazon acelera of ta sinti manera barbulet den bo stoma. Un persona por sinti manera cu nan no por anda cu e situacion, por sinti spanta y cu miedo, intrankil of cu hopi stress. Sintomanan di comportacion por inclui retira of aleha bo mes di hende, sinti agita, agresividad of uzo di substancianan entre otro di alcohol, pa maneha cu e stress y ansiedad. 

Con COVID-19 por influencia ansiedad?

Hasta den e ausencia di un malesa mental, mayoria hende lo por experiencia cierto di e sintomanan di ansiedad durante e periodo aki. E noticianan catastrofico relaciona cu COVID-19 por motiva pensamentonan circular, tristeza y iritabilidad serca diferente persona. Desde e momento cu COVID-19 a yega Aruba tin hopi persona cu a perde trabou y tin preocupacion grandisimo pa nan situacion financiero, hopi ta experiencia un cambio abrupto den nan rutina di dia y ta sinti isola y tur e factornan aki por influencia e sentimento di stress y ansiedad.

Si bo persona ta sinti hopi stress y ansiedad e ta importante pa expresa y haya sa con pa maneha esaki. Den un forma anonimo y GRATIS por tuma contacto cu nos Hotline na 2810909 pa combersa un poco di locual cu ta duna bo e stress y e ansha. Nos tey tur dia di 2pm te cu 8pm. 

Categories
Public Relations

Cuida bo salud mental

Cuida bo salud mental durante e temporada dificil aki

Nos ta un comunidad chikito. Esaki ta nifica hopi cos pa nos manera un isla, pero sigur ora ta trata di un pandemia cu ta afectando mundo, esaki por tin un peso mas grandi pa nos ora ta trata di stress. 

Pa e motibo aki ta sumamente importante pa cuida bo mes, bo amigonan, y bo famia pa yuda maneha stress. Cosnan esencial pa tene na cuenta ta por ehempel tuma un pausa di mira, lesa of scucha noticia, incluyendo rednan social. Sigui noticia tocante e pandemia constantemente por causa molester, aumentando bo stress.

Tuma roseanan profundo, stretch, haci ehercicio, of meditacion, ta por ehempel actividadnan cu bo por incorpora den bo bida diario pa rebaha bo stress. Traha tempo pa relaha y purba di haci otro actividadnan cu bo ta disfruta. Conecta cu otronan, papia cu hende cu bo ta confia tocante bo preocupacionnan y con bo ta sinti. Percura tambe pa si bo ta bay comparti informacion, pa esaki ta informacion adecua y corecto tocante Coronavirus, pa asina yuda hende evita stress innecesario.

Bo salud mental ta hopi importante pa bo keda consciente riba dje durante momentonan fastioso manera cu nos ta actualmente aden.  Pa personanan por ehempel cu a yega di sufri di condicion mental, ta recomenda pa continua nan tratamento y keda consciente riba sintoma nobo of cu ta empeora. Manera menciona, ta importante pa eherce diferente actividadnan manera haci ehercicio regularmente, descansa, drumi bon y percura tambe pa un bon ciclo di alimentacion balansa.

Tur hende ta reaciona diferente na e situacion di stress y preocupacion. Con abo ta responde na un crisis por haci un diferencia importante pa bo mes y bo famia. Si bo persona ta sinti cu bo mester di sosten of ayudo psicologico durante e temporada dificil aki yama e Hotline 2810909 pa asina papia cu un profesional. Nan tey pa bo tur dia di 2’or merdia te cu 8’or anochi. Atende di un forma responsabel y positivo cu e stress y precupacionnan den e periodo di crisis aki, lo haci abo y bo famia mas fuerte.

Categories
Public Relations

Efectonan di Covid-19 riba nos salud mental

Stress y ansiedad por tin efecto negativo riba nos salud mental, emocional y fisico.

Con ta cu bo?

Durante e temporada aki di crisis relaciona cu COVID-19 (Coronavirus), Sociaal Crisiplan ta keda traha pa e bienestar di nos muchanan, hoben y famianan den nos comunidad, muy en especial famianan cu por ta pasando den problemanan social. 

Manera cu nos bida ta cambiando relaciona cu Coronavirus, e ta hopi importante pa nos tene na cuenta varios factor cu por afecta nos na un forma emocional, mental y fisico cu nos no ta desea of ta prepara pe. 

Un pandemia di malesa infeccioso, manera Coronavirus ta causa y aumenta e nivel di stress, preocupacion y ansiedad pa un persona y su famia. Miedo y ansiedad tocante un enfermedad y tur su consecuencianan por trece preocupacionnan serio y causa emocionnan fuerte entre adulto y muchanan den un famia. E emocionnan aki por escala na problema den famia y por resulta den violencia domestico caminda e mucha tambe ta bira un victima. 

No ta solamente e stress por haci bo daño pero tambe e miedo pa bo salud y di bo sernan keri. Otro factornan cu tambe por afecta bo estado di salud ta e inseguridad relaciona cu e cambionan abrupto den nos bida diario, inseguridad financiero, dificultad pa drumi of concentra, aumento den uzo di alcohol, tabaco of otro droganan y mas. Tur esakinan ta factornan cu ta acumula door di stress y preocupacion y cu por resulta den comportacionnan y decionnan indesea.

Durante e temporada di crisis aki nos mester presta mas atencion riba esnan rond di nos. Especialmente esnan vulnerabel cu ta personanan mas grandi den edad, esnan cu enfermedad cronico cu ta na riesgo mas halto pa bira malo, nos muchanan y hobennan, y personanan cu condicionnan mental. Nan ta e gruponan cu por ser afecta mas fuertemente na stress durante temponan di crisis. 

Tur hende ta reaciona diferente na e situacion di stress y preocupacion. Con abo ta responde na un crisis por haci un diferencia importante pa bo mes y bo famia. 

Si bo persona ta sinti cu bo mester di sosten of ayudo psicologico durante e temporada dificil aki yama e Hotline 2810909 pa asina papia cu un profesional. Nan tey pa bo tur dia di 2’or merdia te cu 8’or anochi. Atende di un forma responsabel y positivo cu e stress y precupacionnan den e periodo di crisis aki, lo haci abo y bo famia mas fuerte.