Categories
Public Relations

Centro pa Hoben y Famia tey pa yuda ‘bo

Un di e proyectonan fundamental di Sociaal Crisis Plan ta e Centro pa Hoben y Famia cu a habri su portanan den luna di july di e aña aki. Un centro cu ta brinda guia y sosten preventivo na hoben y famianan den nos comunidad. 

Centro pa Hoben y Famia ta un colaboracion entre diferente instancia caminda ta brinda guia y sosten den cuadro preventivo na famianan y hobennan vulnerabel aki na Aruba. E meta principal di e centro aki ta pa 1. brinda e sosten y guia den educacion y lantamento di yiu na mayornan, famia, educador y profesional. 2. Ofrece programanan educativo specialmente na nos hobennan pa cu desaroyo riba e nivel social-emocional, personalidad y liderazgo. 

Na Centro pa Hoben y Famia ta sinta hunto FADA, Wit Gele Kruis, Fundacion Respeta Mi, Fundacion Pa Nos Muchanan, Tienda di Educacion, Departamento di Asunto Social, Heart Centered Leadership Foundation, Telefon Pa Hubentud (131) y Consultorio pa Asuntonan di Adiccion (CAA). Asina aki nan por duna e ayudo y guia na hobennan y famianan bou di un solo dak.

Den cuadro di prevencion e Centro pa Hoben y Famia ta bay ta e prome paso pa nos famianan y hobennan aki na Aruba pa asina nan ricibi e sosten y guia profesional cu nan tin mester pa combati nan problemanan social-emocional. E parti di prevencion ta un di e prome pasonan pa combati problemanan social den un comunidad y pesey e Centro pa Hoben y Famia ta un logro sumamente importante pa nos isla di Aruba y su hendenan. 
Pa mas informacion por tuma contacto directo cu Centro pa Hoben y Famia na 528-1200, por bishita nan personalmente na Sabana Blanco 68-C (ex. Acer building) na Wayaca. Tambe por comunica via email na centropahobenyfamia@gmail.com of riba Facebook @centropahobenyfamia.

Categories
Public Relations

Codigo di Proteccion Infantil y Hubenil den pleno proceso di preparacion

Desde aña 2018, Gobierno di Aruba a tuma iniciativa pa bin cu un Sociaal Crisis Plan, cu ta encera un total di 31 proyecto riba e areanan: enseñansa, husticia, salud publico y social, cu e unico meta pa nos muchanan di Aruba lanta den un ambiente cu siguridad y proteccion. Banda di esey e profesionalnan na Aruba a indica cu tin un necesidad enorme con pa anda concretamente cu e casonan di (sospecho) di abuso di mucha y violencia relacional y esaki a conduci pa desaroya un “Codigo di Proteccion” cu ta un di e basenan di mas importante di Sociaal Crisis Plan.

E meta di e “Codigo di Proteccion” ta pa percura pa tur mucha na Aruba por crece den siguridad y fortalece e structura di cuido y trahamento hunto den e instancianan esencial cu ta forma un parti hopi importante den e bida di un mucha y un hoben. E plan di e proyecto aki ta dirigi riba e desaroyo di e “Codigo di Proteccion” infantil y hubenil di Aruba y e cuadro di evaluacion ta e parti di mas importante cu ta fungi como preparacion di e Ley. Pa e 5 stapnan den e Codigo di Proteccion ta trahando hunto cu Unicef Hulanda y tambe Augeo Foundation di Hulanda caminda lo haci uzo di e infrastructura di “Meldcode Huiselijk Geweld en Kindermishandeling” manera esun cu Hulanda ta uza pa aplica aki na Aruba.

Desde mei 2019 a cuminsa cu e trayecto di preparacion pa e ley di Codigo di Proteccion entre sectornan; Hudicial, Social, Salubridad y Ensenjansa. Den cada sector tin un lider di proyecto cu ta encarga cu e preparacionnan pa cu e Ley di Codigo di Proteccion den e veld. Ultimo desaroyonan ta indica cu diferente investigacionnan y analysis a tuma luga den tur 4 sector , den e ultimo lunanan. 

Den lunanan venidero di aña 2020 lo tuma luga diferente accionnan dentro di e sectornan pa asina finalisa e preparacion di e ley di Codigo di Proteccion. Ta premira cu lo finalisa e preparacionnan di e Ley di Codigo prome cu fin di anja 2020. 

Pa mas informacion tocante e Ley di Codigo di Proteccion por tuma contacto cu Lider Nacional di Proyecto via email sueann.ras@gobierno.aw

Categories
Public Relations

Preparacion y desaroyo pa cu introduccion di Ley di Creche

Implementacion di Ley di Creche (kinderopvang) porfin ta bay bira un hecho. E implementacion di Ley di Creche ta un di e proyectonan cu ta cay bou di auspicio di Sociaal Crisis Plan (SCP) cu ta boga pa e siguridad y bienestar di nos muchanan cu ta bay un crèche (kinderopvang).

Actualmente e ley di Creche ta den e proceso di revision cu diferente hurista. No obstante cu tin e situacion di Covid-19, a continua cu e investigacion den e veld. A haci e “nul-meting” cu un total di 78 centro di cuido di mucha y actualmente falta un 37 centro pa bishita pa asina por completa cu e parti di e investigacion aki.  CBS ta encarga pa finalisa e raportahe cu e resultadonan di e investigacion aki y ta premira cu esaki lo keda cla pa fin di september. E meta di e investigacion aki ta pa crea un plataforma nacional, basa ariba e resultadonan, cu lo tin como miembro diferente lidernan di centro di cuida di mucha. 

Ta trahando tambe riba un structura di cuido. Ta referi na e Codigo di Proteccion cu tambe ta trahando riba dje. Ta trahando ariba e parti di con ta señala, y tambe inspecciona y garantisa calidad, cu ta hopi importante. “Pero no calidad solamente di cuido, pero tambe calidad di e lidernan mes cu tin eyden” – segun lider di proyecto sra. Sue-Ann Ras. Aworaki ley ta bisa cu un persona cu ta traha na crèche mester ta minimo un LBO’er pa e lidernan cu ta traha cu e muchanan. Pero tambe tin mimino un MBO’er pa esnan cu ta dirigi e crèche. Eynan lo bay traha cu inspectoria di enseñansa, departamento di enseñansa y otro fundacion pa por pone tur e hendenan aki riba nivel mas halto pa loke ta trata enseñansa propio.

A indica tambe cu desde october 2019 ta trahando cu un stuurgroep di cual sra.Laclé-Ras ta e coordinador nacional. E stuurgroep ta inclui partnernan e.o. Fundacion Pa Nos Muchanan, Departamento di Enseñansa, Salubridad Publico y Departamento di Asuntonan Social.

Pa mas informacion tocante e Ley di Creche por tuma contacto cu Lider Proyecto via email sueann.ras@gobierno.aw.

Categories
Public Relations

Bati, kima, sofoca, kinipi tur ta forma di abuso di mucha!

Abuso fisico ta un topico cu hopi hende tin diferente punto di bista y opinion di dje. E pregunta cardinal ta ki ora nos ta papia di abuso fisico di un mucha of hoben? Ki ora como mayor of cuidado di mucha nos ta pasa e liña di “pasa un klap” y “bati” un mucha of hoben? Kico ta e actonan cu ta wordo reconoci como abuso fisico di un menor?

Abuso fisico di menor ta ora un persona ta dal of haci daño fisico intencional na un mucha, esaki ta wordo considera como abuso fisico. Ora un persona ta keda sin duna un mucha locual ta su necesidad basico di bida manera: cuminda, un dak pa e biba, scol, structura den su desaroyo, educacion of recreacion tambe ta un forma di abuso di mucha.

Actonan di abuso fisico di mucha:

  • Bati un mucha
  • Kima un mucha, cu awa cayente, sigaria etc.
  • Sofoca of trata di choca un mucha
  • Sacudi, tira, dal of morde na su curpa
  • Trata di wanta bou di awa
  • Duna un mucha veneno cu ta afecta su salud
  • Kishiki den forma extremo y sin su permiso
  • Kinipi, pas’e un wanta of lag’e cay pa malo
  • Tur otro forma cu ta haci daño na su curpa

Retene un mucha di por drumi bon, come bon of haya su medicamento tambe ta conta como abuso di mucha.

Con pa señala abuso fisico di mucha?

Ora un mucha ta wordo abusa fisicamente por reconoce esaki na cierto señalnan. E señalnan por ta varios y ta diferencia pa cada mucha y su situacion specifico. E ta importante pa semper tene cuenta cu tin e posibilidad cu e señalnan aki no semper ta duna indicacion cu tin abuso fisico di mucha andando y cu esakinan por a wordo causa door di otro motibonan. Pa es motibo semper mester keda alerto y no keda keto pa busca ayudo of conseho di nos profesionalnan. Paso cu e accion corecto bo por salba un bida.

Señalnan di abuso fisico:

  • E mucha ta expresa y ta papia cu un adulto ta abusa di dje
  • Pleki blau na wowo, cara of curpa cu no tin splicacion aceptabel
  • Weso di curpa kibra, marcanan di djiente (mordi) of kemadura riba curpa
  • Cambio diripiente den comportacion di un mucha
  • Comportacion hopi bruto, agresivo of hopi negativo
  • Comportacion demasiado keto y tin hopi dificultad pa cera amistad
  • E mucha ta protesta, yora y sclama ora cu e mester bay cierto luga por ehempel: su cas, scol, creche, of na un otro luga of cas cu e abuso ta tuma luga
  • E mucha ta mustra di tin hopi miedo pa un persona specifico
  • E mucha ta hopi alerto y ta ansha mescos cu algo malo ta bay pasa cu ne
  • E mucha ta reacciona cu miedo ora bo mishi cu ne
  • E mucha ta bisti paña inadecua pa tapa e marcanan ariba su curpa por ehempel; manga largo, carson largo ora ta haci calor
  • E mucha ta mustra mal cuida y ta semper cansa
  • E mucha ta keda te lat ariba caya y ta parce bandona
  • E famia ta hopi isola y no ta permiti e muchanan pa tin contactonan cu otronan

Kico abo por haci pa yuda un mucha?

Silencio ta permiti cu violencia ta sigui sosode. Si bo ta sinti of tin sospecho cu algo no ta corecto of bo ta mira of scucha algo sospechoso, por fabor no keda den silencio y acudi na un instancia pa ayudo.

  • Yama Bureau Sostenemi na 588-1010 si bo mester di conseho, tin sospecho y of kier raporta un caso di abuso di mucha;
  • Yama Fundacion Respeta Mi na 582-4433 pa informacion, conseho y guia tocante caso di abuso di menor;
  • Yama Tienda di Educacion na 161 pa guia tocante lantamento di mucha y hoben;
  • Yama seccion Bida y Famia di Departamento di Asunto Social na 528-1150 pa guia psicologico y ortopedagogico pa famia y pareha.

Den un caso di emergencia cu bo ta sinti cu e bida di un mucha ta na peliger yama Polis na 100! Un yamada por scapa un bida cu trauma. Un yamada por salba un bida.

E ta hopi importante pa nos como comunidad ta consciente y bon informa di e señalnan di abuso di mucha pa asina nos por actua debidamente. Bishita nos pagina “Reconoce abuso di mucha” y keda bon informa. Bo iniciativa por salba un bida di un mucha, paso e bienestar y siguridad di nos muchanan ta e responsabilidad di nos tur.

Categories
Public Relations

Abuso sexual di menor na Aruba

Un di e topiconan cu menos ta ser papia di dje ta: abuso sexual di menor. E idea cu un mucha of un hoben bou di 18 anja ta victima di abuso sexual por lanta pensamento di trauma cerca hopi di nos cu ta haci’e mas dificil pa papia di dje. Online por haya hopi informacion tocante abuso sexual di menor, pero abo ta na altura di kico ta abuso sexual, con pa reconoce esaki y kico abo por haci aki na Aruba pa yuda un mucha?

Kico ta abuso sexual di menor?

Abuso sexual ta wordo defini ora cu un menor di edad ta wordo forsa of invita pa participa den actonan sexual cu un persona. E forma cu nos ta pensa di biaha riba dje ta ora ta trata di abuso sexual cu penetracion den parti priva (oral, vagina, anus) di un menor. No obstante, tin hopi mas forma cu abuso sexual di menor por tuma luga. Akinan nos ta duna un lista di diferente actonan di abuso sexual;

Actonan di abuso sexual di mucha:

  • Acto sexual cu penetracion, manera “rape” of sexo oral.
  • Acto sexual sin penetracion manera mishimento cu paña bisti na parti priva, fregamento, sunchimento of masturbacion.
  • Laga un mucha wak otro persona participa den actonan sexual, manera pornografia of den persona.
  • Laga un mucha hunga of uza obhetonan di placer sexual.
  • Conta chiste di “dobel-sinti” of di “mal ehempel” na un mucha.
  • Forsa of invita un mucha pa kita su paña pa placer sexual.
  • Mustra bo parti priva na un mucha “flashing”.
  • Encurasha un mucha pa actua den un forma sexualmente inapropia.
  • Prepara un mucha pa abuso of actividad sexual ora e bira mas grandi “grooming”.

Tur e actonan aki ta wordo considera como abuso sexual. Abuso sexual ta castigabel pa Ley y ta bay contra e derechonan internacional di mucha.

Kico abo por haci pa yuda un mucha?

Silencio ta permiti cu violencia ta sigui sosode. Si bo ta sinti of tin sospecho cu algo no ta corecto of bo ta mira of scucha algo sospechoso, por fabor no keda den silencio y acudi na un instancia pa ayudo.

  • Yama Bureau Sostenemi na 588-1010 si bo mester di conseho, tin sospecho y of kier raporta un caso di abuso di mucha;
  • Yama Fundacion Respeta Mi na 582-4433 pa informacion, conseho y guia tocante caso di abuso di menor;
  • Yama Tienda di Educacion na 161 pa guia tocante lantamento di mucha y hoben;
  • Yama seccion Bida y Famia di Departamento di Asunto Social na 528-1150 pa guia psicologico y ortopedagogico pa famia y pareha.

Den un caso di emergencia cu bo ta sinti cu e bida di un mucha ta na peliger yama Polis na 100! Un yamada por scapa un bida cu trauma. Un yamada por salba un bida.

E ta hopi importante pa nos como comunidad ta consciente y bon informa di e señalnan di abuso di mucha pa asina nos por actua debidamente. Bishita nos pagina “Reconoce abuso di mucha” y keda bon informa. Bo iniciativa por salba un bida di un mucha, paso e bienestar y siguridad di nos muchanan ta e responsabilidad di nos tur.

Categories
Public Relations

Negligencia di mucha. Abo sa kico esaki ta?

Nos ta papia di negligencia di mucha, ora e mayornan of e cuidado di un mucha, continuamente ta faya pa provee e necesidadnan basico fisicamente y psicologicamente cu un mucha tin mester cu por resulta den un descapacidad di e mucha su salud y desaroyo. E efectonan di negligencia di mucha ta pa bida largo y por causa sentimentonan profundo di soledad, isolacion y un autoestima hopi abou.

Pero ki ora nos ta papia di negligencia di mucha?

  • Ora cu no ta duna un mucha cuminda, paña of cuido di salud cu e tin mester;
  • Ora ta cera un mucha den un camber of un “closet” cu e no por sali;
  • Ora cu no ta duna un mucha e proteccion di un cas, ta bandona un mucha of ta saca un mucha for di cas;
  • Ora ta expone un mucha den un situacion peligroso caminda e por experiencia daño emocional of fisico;
  • Ora ta laga un mucha pa un periodo hopi largo su so na cas of un luga desconoci;
  • Ora un adulto ta neglisha of no ta atende cu e necesidadnan emocional of fisico di un mucha, ta papia di negligencia di mucha, cu ta un forma di abuso di mucha;

Con pa señala negligencia di mucha?

Si un mayor of cuidado di mucha ta comete actonan di negligencia di mucha, por reconoce esaki na entre otro e siguiente señalnan:

  • E mucha tin necesidad di cuido medico of dental cu no ta wordo atendi;
  • E mucha ta cana rond continuamente cu paña sushi, cabey sin laba of ta cana rond sin baña;
  • E mucha ta haci uzo di alcohol of droga;
  • E mucha ta bisti e mesun pañanan tur ora y semper ta bisti inapropia tur caminda;
  • E mucha ta falta su scol frecuentemente;
  • E mucha tin mester di un “bril” pero nunca e tin esaki;
  • E mucha ta bisa of ta expresa cu e ta su so na cas y cu no tin niun hende pa wak pe na cas;

E señalnan aki hopi biaha ta acumula durante un periodo prome cu constata cu tin un caso di negligencia ta tumando luga. Pa es motibo semper mester keda alerto como adulto y no keda keto pa busca ayudo of conseho di nos profesionalnan. Paso cu e accion corecto bo por yuda y te hasta salba un bida.

E ta tuma un comunidad pa lanta un mucha, pesey Comision Vision Pedagogico ta brinda e guia, sosten y educacion na mayornan y cuidadonan di mucha pa asina asisti den un forma preventivo den e lantamento di mucha y pa asina preveni tambe abuso di mucha.

Kico abo por haci pa yuda un mucha?

Silencio ta permiti cu violencia ta sigui sosode. Si bo ta sinti of tin sospecho cu algo no ta corecto of bo ta mira of scucha algo sospechoso, por fabor no keda den silencio y acudi na un instancia pa ayudo.

  • Yama Bureau Sostenemi na 588-1010 si bo mester di conseho, tin sospecho y of kier raporta un caso di abuso di mucha;
  • Yama Fundacion Respeta Mi na 582-4433 pa informacion, conseho y guia tocante caso di abuso di menor;
  • Yama Tienda di Educacion na 161 pa guia tocante lantamento di mucha y hoben;
  • Yama seccion Bida y Famia di Departamento di Asunto Social na 528-1150 pa guia psicologico y ortopedagogico pa famia y pareha.

Den un caso di emergencia cu bo ta sinti cu e bida di un mucha ta na peliger yama Polis na 100! Un yamada por scapa un bida cu trauma. Un yamada por salba un bida. E ta hopi importante pa nos como comunidad ta consciente y bon informa di e señalnan di abuso di mucha pa asina nos por actua debidamente. Bishita nos pagina “Reconoce abuso di mucha” y keda bon informa. Bo iniciativa por salba un bida di un mucha, paso e bienestar y siguridad di nos muchanan ta e responsabilidad di nos tur.

Categories
Public Relations

Abuso emocional of verbal y su efecto riba nos muchanan.

Oranjestad, Aruba – Stress, ansiedad, miedo, preocupacion y panico ta emocionnan cu ta biba ainda den hopi hende relaciona cu e crisis di Covid-19. E acumulacion di e emocionnan aki por resulta den problemanan mental serio y hasta explosion di rabia cu por transforma den abuso emocional of verbal.

Sociaal Crisis Plan a indica den un encuesta cu wordo ehecuta riba social media, cu e resultadonan ta mustra cu 52% a indica di haya tendencia pa zundra, grita, papia palabra cu famia, yiunan of colega, esaki ta algo cu ta sosode hopi of tur dia den cierto caso. E tendencianan verbal aki ta un forma di abuso emocional of verbal y cu tin su efectonan hopi serio riba e desaroyo di un mucha. 

Kico ta Abuso emocional of verbal?

Abuso emocional ta incera abuso verbal, caminda e mucha ta wordo grita, zundra, humilia y insulta constantemente. Abuso emocional tambe ta ora un adulto den cuido di un mucha ta keda sin duna e mucha cariño, amor, calor of atencion cu e tin mester pa su desaroyo social-emocional. Abuso emocional por laga un mucha sinti cu e no tin balor y cu niun hende no ta stim’e y e impacto negativo aki tin su efecto riba e bida completo di un mucha. 

Kico abo por haci pa yuda un mucha? 

Silencio ta permiti cu violencia ta sigui sosode. Si bo ta sinti of tin sospecho cu algo no ta corecto of bo ta mira of scucha algo sospechoso, por fabor no keda den silencio y acudi na un instancia pa ayudo.

  • Yama Bureau Sostenemi na 5881010 si bo mester di conseho, tin sospecho y of kier raporta un caso di abuso di mucha.
  • Yama Fundacion Respeta Mi na 5824433 pa informacion, conseho y guia tocante caso di abuso di menor.
  • Yama Tienda di Educacion na 161 pa guia tocante lantamento di muchan y hoben.
  • Yama seccion Bida y Famia di Departamento di Asunto Social na 5281150 pa guia y conseho pa famia.

E ta hopi importante pa nos como comunidad ta consciente y bon informa di e señalnan di abuso di mucha pa asina nos por actua debidamente. Bishita nos “Reconoce abuso di mucha” y keda bon informa. Bo iniciativa por salba un bida di un mucha, paso e bienester y siguridad di nos muchanan ta e responsabilidad di nos tur.

Categories
Public Relations

Crisis Covid-19, violencia domestico y nos muchanan.

Oranjestad, Aruba – Ta importante pa nos realisa cu den e situacion dicifil aki COVID-19 a trece cu’ne circumstancianan cu por resulta den emocionnan halto di stress, ansiedad, miedo, preocupacion y panico. Tur e emocionnan aki por resulta den problemanan mental serio y hasta explosion di rabia cu por transforma den tendencianan violento.

Tendencia violento por incera actonan di abuso fisico, pero tambe abuso emocional of verbal. E tension y rabia den un famia por desaroya of escala e violencia domestico entre pareha, caminda e muchanan tambe por bira victima di e abuso. Como adulto e ta hopi importante pa ta consciente y bon informa riba e efectonan cu tendencianan di violencia of abuso por tin ariba un mucha. Nos ta papia di un mucha, ora e tin entre 0 pa 18 aña, cu ta wordo considera como un menor di edad.

Kico ta violencia domestico?

Violencia domestico por sosode ora cu den un famia tin conflicto entre diferente persona. Violencia domestico ta wordo defini como e comportacion abusivo y violento den un relacion cu ta wordo causa door di un persona pa haya of mantene control y poder riba un otro persona.

Violencia domestico por ta abuso verbal, fisico, sexual of psicologicamente y por pasa den cualkier hogar. Un mayor of un cuidado di mucha cu ta den conflicto of un relacion abusivo por pensa cu e violencia no ta afecta e muchanan den famia. Pero echo ta cu hasta si e muchanan no ta wak e actonan di violencia aki, nan ta wordo afecta door e conflicto den famia. E consecuencia di esaki ta cu un mucha por desaroya problemanan serio emocional y di conducta, si e ta experiencia violencia domestico.

Violencia domestico den famia, hopi biaha ta envolvi tambe actonan di abuso di mucha. E mucha por wordo haci daño accidentalmente pero tambe intencionalmente. Pesey ora ta trata di caso di violencia domestico semper mester pensa ariba e bienestar y e siguridad di e muchanan den e cas y no keda keto of tarda pa busca e ayudo.

Kico abo por haci pa yuda un mucha?

Silencio ta permiti cu violencia ta sigui sosode. Si bo ta sinti of tin sospecho cu algo no ta corecto of bo ta mira of scucha algo sospechoso, por fabor no keda den silencio y acudi na un instancia pa ayudo.

  • Yama Bureau Sostenemi na 5881010 si bo mester di conseho, tin sospecho y of kier raporta un caso di abuso di mucha.
  • Yama Fundacion Respeta Mi na 5824433 pa informacion, conseho y guia tocante caso di abuso di menor.
  • Yama Tienda di Educacion na 161 pa guia tocante lantamento di muchan y hoben.
  • Yama seccion Bida y Famia di Departamento di Asunto Social na 5281150 pa guia y conseho pa famia.

Den un caso di emergencia cu bo ta sinti cu bo bida of di un mucha ta na peliger yama Polis na 100! Un yamada por scapa un bida cu trauma. Un yamada por salba un bida.

E ta hopi importante pa nos como comunidad ta consciente y bon informa di e señalnan di abuso di mucha pa asina nos por actua debidamente. Bishita nos website www.scparuba.com y click ariba nos pagina “Reconoce abuso di mucha” y keda bon informa. Bo iniciativa por salba un bida di un mucha, paso e bienester y siguridad di nos muchanan ta e responsabilidad di nos tur.

Categories
Public Relations

Ansiedad, soledad y tendencia violento

Ansiedad, soledad y tendencia violento ta bibando den nos comunidad 

Sociaal Crisis Plan recientemente a ehecuta un encuesta pa purba na midi con comunidad di Aruba ta manehando e ‘Toque de Queda’ y ‘Shelter In Place’ den conexion cu nos salud mental y estado emocional durante e temponan dificil cu nos ta enfrentando. 

E resultadonan di nos encuesta ta mustra cu 44% di persona ta sinti hopi soledad of ta afecta nan tur dia, den e temporada aki di crisis y esaki naturalmente ta relaciona cu e “shelter in place” y tambe e restriccion cu tin pa bishita otro fisicamente. No obstante, den e temporada aki di crisis e ta importante pa haci uzo di technologia pa asina keda den contacto mas cu ta posibel cu bo cernan keri. Paso maske nos tin cu tene distancia fisico, nos por tene contacto social via internet y telefon. 

Otro resultado ta indica cu 39% di persona ta sinti hopi ansiedad of ta afecta nan tur dia, den e temporada aki di crisis y esaki ta wordo causa pa tur e incertidumbre cu nos a wordo confronta cu ne, caminda hopi hende actualmente ta den un situacion hopi dificil. Hopi preocupacion relaciona cu problemanan financiero, necesidad di cuminda y preocupacion pa salud di famia ta locual cu nos a midi como e factornan mas comun pa por causa e ansiedad aki. Ta importante pa realisa cu e ansiedad y stress den un termino largo por causa depresion cu ta un enfermedad mental y ta rekeri ayudo profesional. Nos profesionalnan tey pa yuda bo den e momentonan dificil aki, por yama 2810909 tur dia entre 2pm te cu 8pm, pa asina haya guia y sosten psicologico. 

Ora ta toca e tema di violencia fisico y agresion, e resultadonan ta mustra cu un 90% di persona ta indica cu nan no ta sinti e tendencia violento aki desde cu e crisis aki a inicia y solamente 10% ta indica cu nan ta wordo afecta door di e tendencia violento. Pero ora nos compara e cifra aki cu e resultadonan di violencia verbal nos ta observa cu 52% di persona ta idica di haya e tendencia pa zundra, grita y papia palabra malo cu famia, yiunan of conocinan mas hopi of ta afecta nan tur dia . 

E resultadonan ta demostra cu e violencia verbal tambe ta eherce den nos hogarnan y esaki na su turno por crea mas stress y mas ansiedad y por hasta resulta na un sentimento mas profundo di soledad, si un persona no por comunica cu otro den cas. Caminda ambos e adultonan y e muchanan ta mas vulnerabel ainda pa bira victima di abuso. Si bo persona mester di ayudo of conseho tocante abuso di mucha por yama Bureau Sostenemi na 5881010. Si bo ta un persona cu mester di ayudo y conseho tocante violencia domestico tuma contacto cu Fundacion Pa Hende Muhe den Dificultad na 5671670

Sociaal Crisis Plan tey pa yuda bo. Pa mas informacion tocante con pa haya ayudo y guia pa cu bo salud mental, ayudo pa cuminda, casonan di violencia of ayudo pa asistencia financiero por fabor bishita nos website www.scparuba.com of chat cu nos riba Facebook si tin cualkier pregunta. 

Categories
Public Relations

Kico pa haci si bo ta sufri di depresion

Kico bo por haci ora un persona ta sufri di un efermedad mental?

Den e temporada dificil aki, depresion ta algo cu por afecta cualkier persona. Depresion ta un enfermedad mental caminda sentimentonan profundo y tristo por domina un persona su estado emocional. Covid-19 a trece cu ne cambionan drastico cu por causa depresion y e ta importante pa reconoce esaki y tambe pa sa kico por haci ora un persona, sea bo mes of un otro, ta sufri di depresion. 

E reaccion normal di un persona cu ta depresivo ta, pa aleha su mes di tur hende y pa bira pasivo. Un persona asina lo cera su mes den camber, wak hopi television of drumi hopi riba cama. Sinembargo ta husto e actonan aki ta pone cu e depresion ta keda existi y te hasta por bira mas grave.

E prome paso pa mehora estado di animo ta, pa cuminsa na trece mas structura na bo bida diario – entre otro no drumi mucho laat, lanta na ora, come na ora, bira mas activo door di traha den cura, haci limpi den cas, lesa un buki, cana pafo un rato of haci paseonan cortico, bay lama un rato pa relaha. Y por ultimo e ta importante pa keda conecta cu otronan. Yama un famia, bisiña, amigo, amiga of conoci cu bo tin hopi tempo sin papia cu n’e. 

Si bo persona ta sinti e necesidad di combersa cu un profesional tocante salud mental por yama nos na 2810909 den un forma anonimo y GRATIS. Asina nos por combersa y purba na yuda un poco na bo situacion actual. Nos tey tur dia di 2pm te cu 8pm.